SINASAMPALATAYANAN NG IGLESIA NI CRISTO

 

Biblia ang Saligan

Ang banal na kasulatan ang tanging saligan ng pananampalataya at Gawain ng Iglesia ni Cristo.
Ang ilang pangunahing aral ng Biblia na itinataguyod ng Iglesia ay ang mga sumusunod:

Ang  Ama ang iisang tunay na Dios

Sumasampalataya ang Iglesia ni Cristo sa aral ni Cristo at ng Kaniyang mga apostol na ang Ama na lumalang ng lahat ng bagay ang kaisa-isang tunay na Dios. (Juan 17:1,3 ; I Cor.8:6 SNB)

Si Jesucristo ang Anak ng Dios

Sumasampalataya ang Iglesia ni Cristo na si Jesucristo ay ang Anak ng Dios. Siya ay ginawa ng Dios na maging Panginoon at Tagapagligtas. Siya ang iisang Tagapamagitan ng tao sa Dios. Si Cristo ay banat at katangi-tanging tao ngunit Siya’y hindi Dios. (Mat.3:17; Gawa 2:36; 5:31; I Tim.2:5; Juan 10:36; 8:40; Gawa 2:22 ERV)

Iglesia ni Cristo kaparaanan ng Dios sa pagliligtas

 Lubos  na sumasampalataya ang mga kaanib na ang Iglesiang ito na si Cristo din ang nagtatag ang siyang kaparaanan ng Dios sa ikaliligtas ng tao. Ang iglesiang ito ng pinaghandugan ni Cristo ng Kanyang buhay at siyang ililigtas Niya sa Araw ng Paghuhukom. (Mat.16:18; Gawa 20:28Lamsa; Efeso 5:23,25)

Araw ng Paghuhukom

Sumasampalataya ang Iglesia ni Cristo na ang Dios ay nagtakda ng isang araw ng paghuhukom na Kaniyang isasagawa sa buong sanlibutan sa pamamagitan ni Cristo. Ito ay magaganap sa ikalawang pagparito ni Cristo, na siyang kawakasan ng mundo. (Gawa 17:31; Jud.1:14-15; IIPed.3:7,10)

Bautismo

Sinusunod ng Iglesia ni Cristo ang paraang itinuturo ng biblia sa pagbabautismo, na ito’y paglulubog sa tubig. Ang pagtanggap ng tunay na bautismo ay kailangan sa ikapagiging alagad ni Cristo, sa ikapagpapatawad ng kasalanan, at ikapagtatamo ng kaligtasan. (Gawa 8:38; Juan 3:23; Roma 6:3-5; Mat.28:19; Gawa 2:38; Mar. 16:15-16)

 Muling Pagkabuhay

Sumasampalataya ang Iglesia ni Cristo na ng muling pagkabuhay ni Cristo ang pangunahing katunayan na muling bubuhayin ang mga patay. Ang mga kay Cristo ay unang bubuhaying muli upang isama Niya sa Bayang Banal. Makalipas ang isang libong taon, bubuhayin naman ang hindi kay Cristo upang ibulid sa dagat-dagatang apoy. (ICor.15:12-13; I Tess.4:16-17; Apoc.20:5-10; 21:1-4)

 Pagkakaisa

Ang Iglesia ni Cristo ay nanahan sa lubos na pagkakaisa sa pananampalataya at Gawain. Napananatiling matatag ang kaisahan ng Iglesia dahil sa sentralisadong paraan ng pangangasiwa rito. Tinitiyak ng Pamamahala ng Iglesia na buong pagkakaisang naipatutupad sa bawat local nito sa buong mundo ang iisang kalipunan ng mga aral at tuntunin.

 Kabanalan at Moralidad

 Pinananatili ng Iglesia ni Cristo ang isang mataas na pamtayan ng moralidad. Ang kinikilala nitong batayan sa kagandahang-asal at wastong paraan ng pamumuhay ay ang mga aral ng Dios na nasa biblia. Hinuhubog sa kabanalan ang mga kaanib sa pamamagitan ng buong tiygang pagtuturo, pagpapaalala, at kung kinakailangan, pagtutuwid, o pagdidisiplina sa kanila.

Kapayapaan at Katahimikan

 Tumutulong ang Iglesia ni Cristo sa pangangalaga at pagpapanatili ng kapayapaan at katahimikan(peace and order) sa lipunan sa pamamagitan ng pagtuturo sa mga kaanib sa igalang at sundin ang mga batas at patakaran ukol dito. Binabawalan silang sumali sa mga union o anumang kilusang gumagamit ng mga pamamaraang marahas o labag sa batas upang isulong ang kanilang simulain.

Disiplina at Pagsunod sa Batas

Pinahahalagahan ng Iglesia ni Cristo ang disiplina at pagsunod sa batas. Tinutupad nito ang mga tagubilin ng mga apostol na pasakop sa mga pinuno at may kapangyarihan  alalaon baga’y ang lehitimong pamahalaan at sumunod sa mga batas at palatuntunang ipinatutupad (Tito 3:1; I Pedro 2:13).  Subalit sa ibabaw ng alinmang batas , ang sinusunod ng mga kaanib ay ang batas ng Dios para sa Cristiano sa ating panahon ayon sa itinuturo ng Biblia.

Kapatiran at Pagkakapantay-pantay

 Itinataguyod ng Iglesia ni Cristo ang pag-iibigang magkakapatid bilang tunay na Cristiano. Lahat ng kaanib ay pantay-pantay sa paningin ng Dios (Gal.3:26, 28) kaya dito’y hindi nagatangi ng tao batay sa kasari-an, lahi, kalagayan sa lipunan, naabot na pinag-aralan o kabuhayan.

 Kabanalan ng Pag-aasawa

 Sa Iglesia ni Cristo ang kasal ay itinuturing na sagrado at hindi dapat yurakan. Ang Dios ang nagtatag ng pagkakasal at hindi siya pumapayag na maghiwalay ang lalake at babae na pinagsama Niya bilang mag-asawa (Mat.19:4-6). Kaya, ang Iglesia ni Cristo ay hindi sumasang-ayon sa diborsyo, annulment, o legal separation bilang lunas sa problema ng mag-asawa, kung paanong tutol  ito sa live-in o ang pagsasama ng di kasal at same-sex marriage.

Katatagan ng Pamilya

 Kinikilala ng Iglesia ni Cristo na ang pamilya ang pinakamaliit nay unit ng organisasyon nito at ng lipunan. Ang katatagan ng bawat sambahayan ay mahalaga sa katatagan ng buong Iglesia. Nagsisimula sa tahanan ang pagtuturo ng tunay na relihiyon kaya ang wastong pagmamahal at pagpapalaki sa anak ay itinuturo at ipina-a-ala-ala sa lahat ng akmang pagkakataon.

 Paghihiwalay ng Relihiyon at Pamahalaan

 Itinataguyod ng Iglesia ni Cristo ang simulating demokratio ukol sa paghihiwalay ng relihiyon at pamahalaan (Separation of Church and State).  Isinusulong ng Iglesia ni Cristo sa pamamagitan ng payapa at legal na mga pamamaraan ang karapatan at kalayaan ng mga kaanib at mga local nito na magsagawa ng pagsamba at iba pang gawaing panrelihiyon na isinasaad at pinoprotektahan ng saligang – batas ng bansa.